नवी दिल्ली : देशात पुन्हा एकदा कोरोना व्हायरसचा प्रादुर्भाव दिसत आहे. गेल्या २४ तासांत ७२४० नव्या रुग्णांची नोंद करण्यात आली आहे. देशात पुन्हा एकदा कोरोना विषाणूचा फैलाव वेगानं होत आहे. गेल्या दोन दिवसांपासून कोरोनाच्या नवीन रुग्णांची संख्या ४० टक्क्यांनी वाढत आहे.
देशभरात मागील २४ तासांत ७ हजार २४० नवीन कोरोनाबाधित आढळले आहेत. एवढेच नाही तर सध्या देशभरात ३२,४९८ अॅक्टीव्ह रुग्ण असून त्यांच्यावर उपचार सुरू आहेत. मात्र, यापैकी गंभीर आजारी लोकांची संख्या खूपच कमी आहे. आरोग्य विभागाने दिलेल्या माहितीनुसार, मागील २४ तासांच्या कालावधीत ३ हजार ५९१ लोकांना डिस्चार्ज देण्यात आला आहे. तर, यादरम्यान ८ रुग्णांचा कोरोनामुळे मृत्यू झाला आहे.
दिल्लीनंतर महाराष्ट्र आणि केरळमध्ये पुन्हा एकदा कोरोनाच्या रुग्णांमध्ये वाढ दिसत आहे. यात महाराष्ट्राला सर्वाधिक फटका बसतान दिसत आहे. येथे रुग्ण झपाट्याने वाढत आहेत. आतापर्यंत देशात कोरोनाचे एकूण ४ कोटी ३१ लाख ९७ हजार ५२२ रुग्ण आढळले असून, त्यापैकी ४ कोटी २६ लाख ४० हजार ३०१ जण पूर्णपणे बरे झाले आहेत. मात्र, देशात कोरोनामुळे आतापर्यंत ५ लाख २४ हजार ७२३ जणांना जीव गमवावा लागला आहे.
