बोदवड येथील दत्त नगरमधील नागरिकांचा जीव धोक्यात

बोदवड (प्रतिनिधी) शहरातील खान्देलवाल यांची रक्षा गॅस एजन्सी बोदवड शहरातील दत्तनगर भागात भर वस्तीत आहे. या ठिकाणी रक्षा गॅस एजन्सी चे गॅस गोडाऊन असल्यामुळे एखादी दुर्दैवी घटना घडल्यास ह्या ठिकाणच्या रहिवाशांच्या जीवित व वित्त हानीस कोण जबाबदार असा प्रश्न येथील रहिवासी उपस्थित करीत आहे. हे गोडाऊन भर वस्तीत असल्यामुळे गॅसचे भरलेले ट्रक येथे येन रस्त्यात उभे राहतात. त्यामुळे नागरिकांचे रस्त्यावरून ये-जा करण्यास हाल होतात.

तसेच भरलेल्या तसेच रिकाम्या हंड्या रिक्षात किंवा ट्रकमध्ये भरताना व खाली करताना होणाऱ्या आवाजामुळे नागरिकांना व्याधी निर्माण होत आहे. यामुळे नागरिक त्रस्त झाले असून, प्रशासनाने जीवित वा वित्तहानी ची वाट न बघता रक्षा गॅस एजन्सी विरोधात कठोर कार्यवाही करून सदर गॅस गोडाऊन शहराबाहेर इतरत्र हलवून, नागरिकांना जीवनदान द्यावे अशी अपेक्षा रहिवाश्यांमधुन व्यक्त केली जात आहे.