धुळे (प्रतिनिधी) औरंगाबाद आणि अहमदनगर महानगरपालिकेच्या धर्तीवर धुळे शहरातील मालमत्तेच्या मोजणीचे काम सॅटेलाईटद्वारे करण्यात येत आहे. त्यासाठी निविदा प्रक्रियाही राबविण्यात आली होती. पण, स्थायी समितीच्या बैठकीत त्याची फेरनिविदा काढण्यावर सदस्यांचे एकमत झाल्याने मालमत्तेचे संगणकाद्वारे होणारे फेरमूल्यांकन सुरु झाले आहे. हे काम आत्तापर्यंत ६० टक्केच झाले आहे. उर्वरित ४० टक्के काम संथगतीने सुरु आहे. येथील महापालिकेमध्ये सुमारे ८० हजार मालमत्ता नोंदविण्यात आल्या आहेत.
१९९२-९३ पासून शहरातील संपूर्ण मालमत्तांच्या फेरआकारणीची कार्यवाही करण्यात आलेली नाही. जीआयएस प्रणालीद्वारे सर्वेक्षण करून मालमत्तांचे बांधकाम प्रकार, रहिवास वाणिज्य, शासकीय इमारत, मंदिर आदींचे सर्वेक्षण करण्यात येणार आहे. त्यांचे नकाशे, फोटो काढणे, डेटा तयार करून संगणकीकृत करणे, मूल्य निर्धारण डेटा ऑन करणे, ऑनलाईन मालमत्ता कर प्रणाली सुधारित दर फेरमूल्यांकन करण्याकरिता उपयोगात येईल. याआधी अहमदनगर, औरंगाबाद महानगरपालिकेने सॅटेलाईटद्वारे मालमत्तेचे फेरमुल्यांकन केले होते. त्यामुळे यासंदर्भात त्यांच्याकडून माहिती घेण्यात आली होती. त्या माहितीनुसार अंदाजित ३ ते ४ कोटींपर्यंत खर्च होईल, असे स्पष्ट झाले होते. यासंदर्भात महापालिकेच्या स्थायी समितीच्या सभेत चर्चा देखील झाली त्यानंतर याचे काम एका खाजगी कंपनीला देण्यात आले आहे. ती कंपनी आता हे काम करीत आहे. मात्र हे काम संथगतीने सुरु असल्याने ते लवकरात लवकर पूर्ण व्हावे, अशी मागणी करण्यात येत आहे. जीआयएस तंत्रज्ञानाद्वारे महानगरपालिकेच्या संपूर्ण हद्दीची उपग्रहाद्वारे प्रतिमा घेऊन सर्वेक्षण करण्यात येणार आहे. जीआयएस तंत्रज्ञानात टाकून अहवाल तयार करता येईल. प्रत्येक वर्षी किंवा दोन वर्षांनंतर पुन्हा उपग्रहाद्वारे प्रतिमा घेऊन अगोदरच्या प्रतिमेतील फरक मिळू शकतो.
फेरमूल्यांकनामुळे मनपाचे आर्थिक उत्पन्न वाढणार
जीएसआय पद्धतीने शहरातील मालमत्तेचे फेरमुल्यांकन झाले तर, त्याचा फायदा महानगरपालिकेच्या आर्थिक उत्पन्नात भर पडणार आहे. तसेच महापालिकेला कराची दर आकारणी दरतक्त्ता समान पद्धतीने लागू करता येईल. जुन्या नव्या मालमत्तांना समान निकष लावता येईल. करयोग्य मूल्य पद्धतीने किंवा भांडवली मूल्य पद्धतीने आकारणी प्रस्तावित करता येईल. इमारतीचा घसारा निश्चित करता येईल. त्याचा फायदा नागरिकांनाही कर आकारणीत मिळणार आहे.
धुळे शहराची हद्दवाढ झाली आहे. जीआयएस प्रणालीद्वारे सर्वेक्षण करून मोजमाप झाले असून आतापर्यंत महापालिकेमध्ये ८० हजार मालमत्ता नोंदविण्यात आली आहे. धुळे शहरामध्ये बरेच बांधकाम असे आहे की, त्यांनी परवानगी घेतलेली नाही. मात्र जीआयएस प्रणालीद्वारे सर्वेक्षण करून मालमत्ता नोंदवण्यात येत आहे. अशी माहिती धुळे महापालिकेचे महापौर प्रदीप कर्पे यांनी दिली आहे.
