मुक्ताईनगरचे राजकारण तापले ; अँड. रोहिणी खडसे यांच्या वाहनावर दगडफेक
जळगाव (प्रतिनिधी) मुक्ताईनगर तालुक्यातील चांगदेव येथून घराकडे निघालेल्या जिल्हा मध्यवर्ती बँकेच्या संचालिका अँड. रोहिणीताई खडसे – खेवलकर यांच्या वाहनावर काल रात्री ९.३० वाजता अज्ञात इसमांनी दगडफेक केल्यामुळे तणावाचे वातावरण निर्माण झाले आहे. दगडफेक झाली त्यावेळी त्यांच्या कारमध्ये त्या स्वतः होत्या, अशी माहिती त्यांच्या कार्यकर्त्यांनी दिली आहे. दरम्यान, याबाबत पोलिस अधिक माहिती घेत असून हल्लेखोरांचा शोध सुरू केला असल्याची माहिती मिळत आहे.
अँड. रोहिणी खडसे – खेवलकर या चांगदेव येथून हळदीचा कार्यक्रम आटोपून कोथळी येथील त्यांच्या घरी परतत होत्या. त्याचवेळी मुक्ताईनगर सूतगिरणी जवळ अज्ञात इसमांनी समोर येत त्यांच्या वाहनावर दगडफेक केली. या दगडफेकीत त्यांची फॉर्च्युनर कार (एम एच १९ सीसी १९१९) याचा पुढील बाजूने काच फुटला आहे. दरम्यान,घटनेमुळे अँड. रोहिणी खडसे या प्रचंड घाबरलेल्या असून कार्यकर्ते त्यांच्या मदतीसाठी घटनास्थळी पोहोचले आहेत. दरम्यान पोलिसांना घटनेची माहिती मिळाली आहे.
निवडणुकीपासून माजी मंत्री एकनाथराव खडसे आणि आमदार चंद्रकांत पाटील यांच्यात वाद सुरू झालेला असून हा वाद आता पोलीस ठाण्यापर्यंत पोहोचलेला आहे. विधानसभेमध्ये देखील याचे पडसाद उमटले होते. तेव्हापासून माजी मंत्री एकनाथराव खडसे आणि आमदार चंद्रकांत पाटील यांच्या कार्यकर्त्यांमध्ये शाब्दिक तसेच सोशल मीडियावर धुमश्चक्री सुरू आहे.
