कचरा संकलनाचे काम देण्याबाबतचे स्थगिती उठविल्याचे आदेशाचे पत्र आमदार फारूक शाह यांना प्राप्त.

(धुळे दि. १८-११-२०२१) धुळे शहराचा कचरा प्रश्न पेटलेला होता. शहरात कचरा सद्यस्थितीमध्ये उचलला जात नव्हता त्यामुळे धुळे शहरात कचऱ्याचे साम्राज्य झाले होते. यामुळे साथीच्या आजारांनी डोकेवर काढले होते त्यात डेंग्यू, मलेरिया सारख्या आजारांनी धुळेकर नागरिक त्रस्त होते. या आजारांनी धुळे शहरातील ४ ते ५ नागरिकांचा बळी गेला असून आजच्या परिस्थितीमध्ये कचरा संकलन करणे अत्यंत आवश्यक झाले आहे हा ज्वलंत प्रश्न आमदार फारूक शाह हे जाणून होते. कचरा ठेका देणे हि धोरणात्मक बाब असल्याने कचरा ठेकेदारा समवेत नवीन करारनामा करून कचरा संकलन करण्याचा ठेका देण्यात यावा जेणेकरून शहरातील नागरिकांना होणारा नाहक त्रास थांबून जनेतची सोय होईल. धुळेकर जनतेचा आरोग्यविषयक प्रश्न लक्षात घेवून धुळे शहराचे आमदार यांनी काल दि. १० नोव्हेंबर रोजी नगरविकास विभागाचे मंत्री एकनाथ शिंदे साहेब आणि प्रधान सचिव यांची मुंबई येथे भेट घेतली होती. त्यात धुळे महानगरपालिका कचरा संकलन करणा-या स्वयंभू ट्रान्सपोर्ट कंपनीला देण्यात आलेली स्थगिती उठविण्यात यावी अशी मागणी केली. त्याच अनुषंगाने आज आमदार फारूक शाह यांच्या या मागणी विनंतीला मान देवून नगरविकास विभागाचे मंत्री आणि प्रधान सचिव यांनी आमदारांकडे स्वयंभू कंपनीला कचरा संकलनाचे काम देण्याच्या स्थगिती उठविल्याचे आदेशाचे पत्र त्याची एक प्रत आमदार फारूक शाह यांच्याकडे सुपूर्द केली. यामुळे शहरातील नागरिकांना होणारा नाहक त्रास थांबून धुळेकर जनतेचा आरोग्यविषयक प्रश्न सुटणार आहे. यामध्ये इतर तक्रारी कायम ठेवून स्थगिती उठवत असल्याची माहिती आमदार फारूक शाह यांनी दिली आहे.