अमेरिकेतील शाळेत १८ वर्षीय हल्लेखोराचा अंदाधुंद गोळीबार ; १८ मुलांसह २१ जणांचा मृत्यू
न्यूयॉर्क : अमेरिकेतील टेक्सासमधील एका शाळेत अंदाधुंद गोळीबार झाला आहे. या गोळीबारात एकूण 21 जणांचा मृत्यू झाला आहे. एका 18 वर्षीय तरुणाने हा गोळीबार केला असल्याचं बोललं जात आहे. मृतकांमध्ये 7 ते 10 वयोगटातील मुलांचा समावेश आहे.
अमेरिकन अधिकाऱ्यांनी दिलेल्या माहितीनुसार, संशयित हल्लेखोरालाही मारण्यात आले आहे. या गोळीबारात मृतकांचा आकडा वाढण्याचीही भीती व्यक्त करण्यात येत आहे. एका वृत्तसंस्थेने दिलेल्या माहितीनुसार, बंदुकधारी तरुण टेक्सासमधील रॉब एलिमेंट्री स्कूलमध्ये हँडगन आणि रायफल घेऊन शिरला. हल्लेखोर हा सॅन अँटोनियो येथील रहिवासी असल्याचं बोललं जात आहे. व्हाईट हाऊसच्या प्रेस सेक्रेटरी काराइन जीन-पियरे यांनी सांगितले की, राष्ट्राध्यक्ष जो बायडेन यांना या घटनेबाबत कळवण्यात आलं आहे. राष्ट्राध्यक्ष बायडेन हे पाच दिवसीय आशिया दौऱ्यावरुन परतत आहेत.
एका वृत्तसंस्थेच्या वृत्तानुसार, या कथित हल्लेखोराने शाळेत गोळीबार करण्यापूर्वी त्याच्या आजीवर गोळ्या झाडून ठार केलं. त्यानंतर त्याने शाळेत अंदाधुंद गोळीबार केला. या गोळीबारात दोन पोलीस अधिकारीही जखमी झाले आहेत. या हल्ल्यानंतर जो बायडेन यांनी एक निवेदन प्रसिद्ध केलं आहे.
