भाजप कार्यालयाबाहेर राज ठाकरेंची गाडी?, चर्चांना उधाण! ; नक्की काय आहे प्रकरण?
मुंबई : मनसे अध्यक्ष राज ठाकरे यांनी भोंग्यांचा मुद्दा उपस्थित केल्यानंतर राजकीय वर्तुळात चर्चेला उधाण आलं आहे. तसेच भाजपबाबत त्यांनी सावध भूमिका घेतली. त्यांनतर भाजप-मनसे युतीच्या चर्चा देखील जोरदार रंगल्या आहेत. दरम्यान, मात्र राज ठाकरे यांच्या पत्नी शर्मिला ठाकरे यांची गाडी भाजप कार्यालयाबाहेर पाहून सर्वांच्या भूवया उंचावल्या आहेत.
राजकीय वर्तुळात जरी राज ठाकरे आणि भाजपा यांची वैचारिक जवळीक वाढत असल्याची आणि युतीची चर्चा असली तरी समाजमाध्यमांवर मात्र राज ठाकरे यांच्या पत्नी शर्मिला ठाकरे यांची गाडी चर्चेचा विषय ठरली आहे. शर्मिला ठाकरे यांची गाडी सोमवारी मुंबईमधील नरीमन पॉइण्ट येथील भाजपाच्या कार्यालयाबाहेर दिसून आली. राज ठाकरे यांनी जी भूमिका घेतली आहे त्यावरून राज ठाकरे आणि भाजपाची युती आगामी काळामध्ये होणार का? किंवा विरोधकांकडून केल्या जाणाऱ्या दाव्याप्रमाणे राज ठाकरे भाजपाच्या सांगण्यावरून हे सर्व करत आहेत का? असे प्रश्न चर्चेचा विषय ठरत आहेत. आता आशा प्रकारच्या चर्चा सर्वत्र सुरू असताना शर्मिला ठाकरे यांची गाडी मुंबई येथील भाजपाच्या कार्यालयाबाहेर दिसून आल्यानंतर समाज माध्यमांवर चर्चेला उधाण आले आहे.
याबाबतची सत्यता काय आहे?
शर्मिला ठाकरे यांची गाडी भाजपा कार्यालयाबाहेर दिसल्यामुळे अनेकांच्या भुवया आश्चर्याने उंचावल्या गेल्या. मात्र या मागची सत्यता काही वेगळीच आहे. सदर गाडी ही पूर्वी राज ठाकरेंच्या पत्नीच्या मालकीची होती. ही गाडी शर्मिला ठाकरे यांच्याकडून सतीश कोठावळे यांनी खरेदी केलेली आहे. सतीश कोठावळे ज्यांनी ही गाडी विकत घेतली आहे, त्यांनी ती सोमवारी भाजपा कार्यालयाच्या समोर लावल्यामुळे चर्चेला उधाण आले होते. त्यांनी ही गाडी राज ठाकरे यांच्या पत्नी शर्मिला ठाकरे यांच्याकडून विकत घेतली असून आता ती गाडी सतीश कोठावळे यांच्या नावावरती करण्यासाठी आरटीओकडे कागदपत्रे दिली असल्याचे कोठावळे यांनी सांगितले. कोठावळे यांनी ही गाडी १४ एप्रिल रोजी खरेदी केली आहे. कोकाटे यांनी दिलेल्या या स्पष्टीकरणानंतर या गाडीमधील राजकीय चर्चांना पूर्णविराम मिळालाय.
