मुंबई : आज सकाळीच अनिल परब यांच्या मरीन ड्राईव्ह येथील सरकारी निवासस्थान आणि वांद्र्यातील घरी ईडीचे अधिकारी दाखल झाले. अनिल परब यांच्याशी संबंधित ७ विविध ठिकाणी या धाडी टाकण्यात आल्या आहेत. यावरून आता राज्याच्या राजकीय वर्तुळात आरोप-प्रत्यारोप सुरू झाले असून त्यासंदर्भात राज्याचे उपमुख्यमंत्री आणि राष्ट्रवादी काँग्रेसचे नेते अजित पवार यांनी प्रतिक्रिया दिली आहे.
दरम्यान, यासंदर्भात बोलताना अजित पवार यांनी त्यांच्या कुटुंबीयांवर प्राप्तीकर विभागाने टाकलेल्या धाडींचा संदर्भ दिला. आज घेतलेल्या पत्रकार परिषदेत ते बोलत होते. “केंद्रीय यंत्रणा वेगवेगळ्या पद्धतीने त्यांना दिलेल्या अधिकारांचा वापर करतात. मागेही अनेकांच्या बाबतीत इन्कम टॅक्स, सीबीआय, ईडीनं कारवाया केल्या. माझ्याही नातेवाईकांच्या बाबतीत इन्कम टॅक्सनं धाडी टाकल्या. त्यांना तपास करण्याचा अधिकार आहे. आत्ताही कारवाई चालू आहे असं मला समजलं. पण कोणत्या आधारावर कारवाई सुरू आहे?” असा सवाल त्यांनी उपस्थित केला.
मागेही काहींनी सूतोवाच केले होते की आता अमक्याचा नंबर, तमक्याचा नंबर. काही जण बोलतात आणि नंतर तशा पद्धतीने घडतं. यात असा यंत्रणांकडून कुणाचाही हस्तक्षेप न होता पारदर्शकपणे तपास करण्यासाठी कुणाची ना नाही. तपासाचा अधिकार नियमाने त्यांना दिला आहे. पण त्याचा गैरवापर होऊ नये एवढी माफक अपेक्षा सगळ्यांची असते”, असं ते यावेळी म्हणाले.
