राज्यमंत्री अब्दुल सत्तार यांच्या वाढदिवसानिमित्त सांस्कृतिक व सामाजिक उपक्रमाचे आयोजन

सिल्लोड (विवेक महाजन) महसुल तथा ग्रामविकास राज्यमंत्री अब्दुल सत्तार यांच्या वाढदिवसानिमित्त सालाबादप्रमाणे याही वर्षी सांस्कृतिक व सामाजिक उपक्रमाचे आयोजन करण्यात आले आहे. सालाबादप्रमाणे याही वर्षी मोफत भव्य सर्वरोग निदान,उपचार ,महा लसीकरण , नेत्र तपासणी – शस्त्रक्रिया, रक्तदान शिबिरासह विविध सामाजिक उपक्रमाचे आयोजन करण्यात आले असून गरजूंनी या शिबिराचा लाभ घ्यावा असे अवाहन आयोजकांच्या वतीने करण्यात आले आहे.

राज्यमंत्री अब्दुल सत्तार यांच्या वाढदिवसानिमित्त दि. 2 जानेवारी रोजी मोफत भव्य सर्वरोग निदान, उपचार व महा लसीकरण तसेच रक्तदान शिबिराचे आयोजन करण्यात आले आहे. शहरातील नगर परिषद प्रशालेच्या मैदानात रविवार ( दि.2 जानेवारी ) रोजी सकाळी 9 वाजेपासून या शिबिरास सुरुवात होणार आहे.

मोफत नेत्र तपासणी – शस्त्रक्रिया शिबिराचे ही आयोजन करण्यात आले आहे. यासाठी नेत्र तपासणी सुरू असून तपासणी अंती दि. 31 डिसेंबर व 11 जानेवारी रोजी नेत्र शस्त्रक्रिया करण्यात येणार असून रुग्णांना मोफत काळे चष्मे व ब्लॅंकेट वाटप करण्यात येणार आहे. दि. 3 जानेवारी रोजी प्रसिद्ध कीर्तनकार ह.भ. प. निवृत्ती महाराज देशमुख यांचे भवन ता. सिल्लोड येथे रात्री 8 पासून कीर्तन होणार आहे. तसेच दि. 4 जानेवारी रोजी अंधारी ता. सिल्लोड येथे रात्री 8 पासून ह.भ.प. रामराव महाराज ढोक यांचे कीर्तन होणार आहे. यासोबतच दि. 8 व 9 जानेवारी रोजी सिल्लोड शहरात शंकरपटाचे ( बैलगाडा शर्यत ) आयोजन करण्यात आले आहे. या शर्यतीत 1 लाख रुपये प्रथम बक्षीस ठेवण्यात आले असून एकूण 21 इतर बक्षीस ठेवण्यात आले आहे.

दि. 2 जानेवारी रोजी निल्लोड ता. सिल्लोड येथे सायंकाळी 7 पासून अशी आमची माय मराठी या लोककला व सांस्कृतिक कार्यक्रमाचे आयोजन करण्यात आले आहे. दि. 1 जानेवारी रोजी शहरातील शिवसेना भवन येथे सकाळी 10 वाजेपासून राज्यमंत्री अब्दुल सत्तार यांचा अभिष्टचिंतन सोहळा होणार आहे. राज्यमंत्री अब्दुल सत्तार यांच्या वाढदिवसानिमित्त सामाजिक उपक्रम अंतर्गत आयोजित विविध शिबिराचा गरजूंनी लाभ घ्यावा तसेच या कार्यक्रम प्रसंगी नागरिकांनी मास्क चा वापर करून कोरोना नियमांचे पालन करावे असे अवाहन शिवसेना, युवासेना, सिल्लोड नगर परिषद , उपजिल्हा रुग्णालय, जिल्हा सामान्य रुग्णालय व मित्र मंडळाच्या वतीने करण्यात आले आहेत.