शिवस्मारक – भीमपार्क राज्यमंत्री अब्दुल सत्तार व जिल्हाधिकाऱ्यांनी केली स्थळ पाहणी

सोयगाव (विवेक महाजन) महसुल तथा ग्रामविकास राज्यमंत्री अब्दुल सत्तार यांच्या संकल्पनेतून फर्दापूर येथे शिवस्मारक व भीमपार्क उभारण्यात येत आहे. शिवस्मारक- भीमपार्कच्या कामाला सुरुवात करण्याच्या दृष्टीने आज रविवार रोजी फर्दापूर येथे महसुल तथा ग्रामविकास राज्यमंत्री अब्दुल सत्तार तसेच जिल्हाधिकारी तथा शिवस्मारक निर्माण समितीचे अध्यक्ष सुनील चव्हाण यांच्या प्रमुख उपस्थितीत स्थळ पाहणी करण्यात आली.

यावेळी अजिंठा लेणीच्या पायथ्याशी असलेल्या वाघूर नदीच्या तीरावरील गट नंबर 67, 107, 109, 111 तर ठाणा शिवारातील गट नंबर 29 व 30 या जागेची पाहणी करण्यात आली. शिवस्मारक व भीमपार्क यासाठी स्वतंत्र जागा असावी. महामार्गाच्या एका बाजूस शिवस्मारक तर दुसऱ्या बाजूस भीमपार्क साठी जागा पाहण्यात आली. स्थळ पाहणी पूर्ण झाली असल्याने यासंदर्भात तातडीने सविस्तर आराखडा तयार करून स्मारक उभारणीची प्रक्रिया गतिमान करा असे निर्देश राज्यमंत्री अब्दुल सत्तार यांनी संबंधित अधिकाऱ्यांना दिले.

याबाबत सविस्तर विकास आराखडा तयार करताना येथील दोन्ही स्मारकाकडे जाण्यासाठी 100 फुटाचा रस्ता तसेच महामार्गावर प्रवेशद्वारराचा समावेश करावा. देश विदेशातील पर्यटक येथे येणार असल्याने त्याप्रमाणे येथे सोयीसुविधा असाव्या, शिवस्मारक व भीमपार्क उभारणाऱ्या कार्यान्वित सर्व यंत्रणेने समनव्यायाने काम करावे, वनविभागाने येथील वनक्षेत्राच्या जागेवर सुशोभीकरण करण्यासाठी कास पठार योजनेच्या धर्तीवर उपाययोजना करण्यासाठी प्रस्ताव सादर करावे त्यासोबतच येथील वाघूर नदीच्या जतन व संवर्धनासाठी प्रस्ताव सादर करण्याचा सूचना राज्यमंत्री अब्दुल सत्तार यांनी संबंधित अधिकाऱ्यांना दिल्या.

यावेळी महसुल तथा ग्रामविकास राज्यमंत्री अब्दुल सत्तार, जिल्हाधिकारी सुनील चव्हाण, उपविभागीय अधिकारी संजीव मोरे, तहसीलदार रमेश जसवंत, उपविभागीय पोलीस अधिकारी विजयकुमार मराठे, महाराष्ट्र पर्यटन विकास महामंडळाच्या प्रादेशिक व्यवस्थापक मोसमी कोसे, सहाय्यक अंजली बडवे, कनिष्ठ अभियंता, पर्यटन प्राधिकरण प्रादेशिक कार्यालयाचे उपअभियंता नगर रचना विभागाचे साहाय्यक संचालज सुमेध खरवडकर, साहाय्यक नगर रचनाकार ओम लहाने, सार्वजनिक बांधकाम विभागाचे अधीक्षक अभियंता विवेक बढे, उपविभागीय अभियंता कुशोर मराठे, अजय टाकसाळ, शाखा अभियंता नितीन राठोड, दराडे, आकार कन्सल्टन्सीचे कौस्तुभ कुर्लेकर, भूमापक प्रशांत पवार, फर्दापूर पोलीस ठाण्याचे एपीआय अमोल मोरे यांच्यासह शिवसेना उपजिल्हाप्रमुख राजू राठोड, सिल्लोड तालुकाप्रमुख देविदास पा. लोखंडे, जि.प. बांधकाम सभापती किशोर बलांडे, सिल्लोड कृउबा समितीचे उपसभापती नंदकिशोर सहारे, जिल्हा परिषद सदस्य गोपीचंद जाधव, फर्दापूर च्या सरपंच शकीलाबी शेख हुसेन, उपसरपंच हिरा चव्हाण , माजी उपसभापती उस्मान खा पठाण, विजय तायडे, अशोक देशमुख आदींची उपस्थिती होती.