नवी दिल्ली (वृत्तसंस्था) निवडणूक आयोग येत्या काही (assembly election 2022) तासांमध्ये उत्तर प्रदेश, गोवा आणि उत्तराखंडसह देशातील ५ राज्यांमध्ये होणाऱ्या विधानसभा निवडणुकांची घोषणा करू शकतो. केंद्रीय निवडणूक आयोगाने सर्व राज्यांमधील निवडणुकांच्या तयारीचा आढावा घेतला आहे. सर्व राज्यांची अंतिम मतदार यादीही प्रसिद्ध झाली आहे. अशा स्थितीत निवडणूक आयोग लवकरच निवडणुकीच्या तारखा जाहीर करेल, अशी अपेक्षा आहे. निवडणूक आयोगाची आज महत्त्वाची बैठक होत आहे. या बैठकीनंतर निवडणुकांची घोषणा होण्याची शक्यता व्यक्त केली जात आहे.
करोना परिस्थितीचा आढावा
निवडणूक आयोगाने निवडणूक होणार असलेल्या राज्यांमधील करोनाच्या परिस्थितीचा गुरुवारी आढावा घेतला. निवडणूक आयोगाने बोलावलेल्या या बैठकीत केंद्रीय आरोग्य सचिव राजेश भूषण आणि आरोग्य तज्ज्ञांचा सहभाग होता. याशिवाय, निवडणूक आयोगाने गृह सचिव अजय भल्ला यांच्यासोबत उत्तर प्रदेश, उत्तराखंड, पंजाब, गोवा आणि मणिपूरमधील कायदा आणि सुव्यवस्थेचा आढावा घेतला होता.
याआधी निवडणूक आयोगाने उत्तर प्रदेश, उत्तराखंड, पंजाब आणि गोव्याचा दौरा करून तेथील निवडणुकीच्या तयारीचा आढावा घेतला होता. त्याच वेळी निवडणूक आयोगाने मणिपूरमधील निवडणुकीच्या तयारीचा व्हिडिओ कॉन्फरन्सिंगद्वारे आढावा घेतला.
उत्तर प्रदेशात गेल्या वेळी कधी झाली होती घोषणा?
उत्तर प्रदेशात २०१७ मध्ये झालेल्या १७ व्या विधानसभा निवडणुकांच्या तारखा ४ डिसेंबर २०१६ ला जाहीर करण्यात आल्या होत्या. गेल्या वेळी राज्यात ७ टप्प्यांत निवडणुका झाल्या होत्या. उत्तर प्रदेशच्या १७ व्या विधानसभेचा कार्यकाळ १५ मे पर्यंत आहे. गेल्या निवडणुका पाहता यावेळी उत्तर प्रदेशमध्ये ८ टप्प्यांमध्ये मतदान होण्याची शक्यता आहे. तर यूपीच्या शेजारील उत्तराखंडमध्ये एका टप्प्यात आणि पंजाबमध्ये ३ टप्प्यात मतदान होण्याची आपेक्षा आहे.
करोनाच्या रुग्णांमध्ये एकीकडे मोठी वाढ होत आहे. अशा परिस्थितीत विधानसभेच्या निवडणुका होण्याची शक्यता आहे. निवडणुका नियोजित वेळेतच व्हाव्यात, अशी मागणी सर्वच राजकीय पक्षांनी केल्याचं तथापि, निवडणूक आयोगाने म्हटलं आहे. तर, करोनाची वाढती रुग्णसंख्या पाहता काँग्रेस आणि आम आदमी पार्टीने उत्तर प्रदेशातील त्यांच्या सर्व सभा रद्द केल्या आहेत.
