अमरावती (पंकज मालवीय) धारणीच्या उपजिल्हा रुग्णालयात आज दिव्यांगांसाठी तपासणी शिबीर व दंत व मोफत ऑपरेशन शिबीर घेण्यात आले. शिबिराचे उद्घाटन मेळघाटचे आमदार राजकुमार पटेल यांच्या हस्ते झाले.
शिबिरात दृष्टिहीन, अंध, मूकबधिर, अपंग यांच्यासाठी शिबिराचे आयोजन करण्यात आले होते. येथील उपजिल्हा रुग्णालयात झालेल्या शिबिरात तपासणीअंती अपंगत्व प्रमाणपत्र देण्यात आले. तसेच भव्य आरोग्य व दंत चिकित्सा शिबिराचे आयोजन करण्यात आले होते. ज्यामध्ये शरीरातील मोठे गळू किंवा गुठळ्या, हर्निया, हायड्रोसेल, नाक, कान, घसा ऑपरेशन, दातांसंबंधी विविध आजारांचे निदान व ऑपरेशन, स्त्रीरोग नसबंदी, बालरोग, कुपोषण व इतर सर्व आजारांवर मोफत उपचार व मार्गदर्शन करण्यात आले. यावेळी आमदार राजकुमार पटेल यांच्या व्यतिरिक्त सामाजिक कार्यकर्ते कालू मालवीय, पा.छोटू देशमुख, पीए रुपेश भारती आदी उपस्थित होते.
