राज ठाकरेंच्या ‘त्या’ वक्तव्यानंतर पुण्यातील मनसेच्या मुस्लिम पदाधिकाऱ्याचा राजीनामा
मुंबई : मनसे अध्यक्ष राज ठाकरे यांनी गुढीपाडव्याला मुंबईत घेतलेल्या मेळाव्यात अनेक मुद्द्यांवर भाष्य करत राज्य सरकारवर सडकून टीका केली होती. दरम्यान त्यांच्या या विधानावर राजकीय आरोप-प्रत्यारोप सुरु असतानाच पक्षाला धक्का बसला आहे. पुण्यातील मनसेच्या मुस्लिम पदाधिकाऱ्याने राजीनामा देत आपली नाराजी जाहीर केली आहे. यावर पक्षाकडूनही प्रतिक्रिया आली आहे.
पुण्यातील वॉर्ड क्रमांक ८४ आणि प्रभाग क्रमांक १८ मधील मनसेचे शाखा अध्यक्ष माजिद शेख या पदाधिकाऱ्याने राज ठाकरे यांच्या मशिदीवरील भोंग्यासंबंधी केलेल्या विधानानंतर राजीनामा दिला आहे. मागील काही दिवसापासून बेरोजगारी, महागाई, शिक्षण यासारखे विषय असताना हे मुद्दे सोडून जात धर्म या विषयावर भर दिला जात आहे. या कारणास्तव मी कोणाच्याही दबावाखाली न येता स्वच्छेने राजीनामा देत असल्याची माहिती माजीद अमीन शेख यांनी आपल्या पत्रात दिली आहे.
या राजीनाम्याबाबत माजिद शेख यांच्याशी संवाद साधला असता ते म्हणाले की, “मी २००९ पासून महाराष्ट्र नवनिर्माण सेनेचं काम करत असून शाखा अध्यक्ष आहे. माझ्या प्रभागात हिंदू-मुस्लिम एकत्रित राहतात. मी माझ्या भागात पक्षाचे विचार तळागाळापर्यंत पोहोचविण्याचे काम केले आहे. पण गुढीपाडव्याच्या दिवशी राज ठाकरे यांनी घेतलेल्या भूमिकेबाबत नागरिकांमध्ये नाराजी असून त्यामुळे मी शहर अध्यक्ष आणि विभाग अध्यक्ष यांच्याकडे राजीनामा दिला आहे”.
पक्षाची प्रतिक्रिया
मनसे नेते संदीप देशपांडे यांनी राजीनाम्यासंबंधी सांगितलं की, “त्यांचा काहीतरी गैरसमज झाला असल्याची शक्यता आहे. आमचे वरिष्ठ पदाधिकारी त्यांच्याशी चर्चा करतील. काही लोक गैसमज करुन देतात त्यातून हे झालं असावं. पण यातून मार्ग निघेल”.
