तब्बल २२ युट्युब चॅनल केंद्र सरकारकडून ब्लॉक ; पाकिस्तानातील ४ चॅनेलचाही समावेश
नवी दिल्ली : भारताच्या राष्ट्रीय सुरक्षा, परराष्ट्र संबंध आणि सार्वजनिक सुव्यवस्थेशी संबंधित चुकीची माहिती पसरवल्याबद्दल 22 YouTube चॅनेल, तीन ट्विटर खाती आणि एक फेसबुक खातं ब्लॉक करण्यात आली आहे. माहिती आणि प्रसारण मंत्रालयाने ही माहिती दिली आहे. 22 चॅनेलपैकी 18 यूट्यूब न्यूज चॅनेल ही भारतीय आहेत आणि चार पाकिस्तान-आधारित यूट्यूब न्यूज चॅनेल आहेत.
माहिती आणि प्रसारण मंत्रालयाने दिलेल्या माहितीनुसार हे यूट्यूब चॅनेल्स भारताची राष्ट्रीय सुरक्षा, परराष्ट्र संबंध आणि सार्वजनिक सुव्यवस्थेशी संबंधित दिशाभूल करणारी माहिती पसरवत होते. केंद्र सरकारकडून कारवाई करण्यात आलेल्या यूट्यूब चॅनेल्सवर टीव्ही वृत्तवाहिन्यांच्या लोकांची तसंच प्रेक्षकांची फसवणूक केल्याचा आरोप आहे. यूट्यूब चॅनेलसोबतच टीन ट्विटर अकाऊंट, फेसबूक अकाऊंट आणि न्यूज वेबसाईट्सही ब्लॉक करण्यात आल्या आहेत.
भारत विरोधी वातावरण निर्मिती करण्यासाठी किंबहुना भारताची बदनामी करण्यासाठी वापरले जाणारे हे चॅनेल्स बंद करण्यासाठी आयटी नियम, 2021 चा वापर करण्यात आल्याची माहिती माहिती आणि प्रसारण विभागाने दिलीय. महत्वाची बाब म्हणजे ब्लॉक करण्यात आलेल्या यूट्यूब चॅनेलवरील दर्शकांची संख्या 260 कोटींपेक्षा अधिक होती. भारताचे परराष्ट्र संबंध आणि सार्वजनिक सुव्यवस्था यांसारख्या संवेदनशील विषयांवर हे चॅनेल्स सोशल माडियीवर खोट्या बातम्या पसरवत होते. त्याचबरोबर राष्ट्रीय सुरक्षेशी संबंधित खोट्या बातम्याही पसरवल्या जात असल्याचा आरोप या यूट्यूब चॅनेल्सवर आहे.
