जामनेर : येथील आनंदयात्री परिवार या संस्थेमार्फत मराठी नववर्षा निमित्त ‘पाडवा पहाट ‘या शास्त्रीय व सुगम संगीताची अनोखी भेट जामनेकरांनी अनुभवली. जयपूर घराण्याचे प्रसिद्ध शास्त्रीय व उपशास्त्रीय गायक पं.सचिन भावसार,पुणे व गानसरस्वती किशोरी आमोणकर यांच्या शिष्या सुनीता टिकारे, मुंबई यांच्या भाव-भक्ती गीतांच्या शास्त्रीय मैफिलीचे आयोजन सोनबर्डी ॲम्फी थिएटर मध्ये करण्यात आले होते.
सोनेश्वर मंदिर ॲम्फी थिएटरचे यावेळी उदघाटन मुख्य अतिथी आ गिरीश महाजन व नगराध्यक्षा साधना महाजन यांच्या हस्ते गुढी उभारून व श्रीफळ वाढवून करण्यात आले. कार्यक्रमासाठी तहसीलदार अरुण शेवाळे, नगरपालिका मुख्यकार्यकारी अधिकारी चंद्रकांत भोसले यांची उपस्थिती होती. मैफिलीला वाद्यवृंद तबला- तेजस मराठे, हार्मोनियम -जितेश मराठे, पखवाज- भूषण गुरव,ताल -उमेश चौधरी ,तानपुरा -कुंदन तायडे यांनी साथसंगत केली. कार्यक्रमाचे सुत्रसंचालन गणेश राऊत यांनी तर आभार डॉ.चंद्रशेखर पाटील यांनी केले.
यशस्वीतेसाठी आनंदयात्रीचे अध्यक्ष डॉ अमोल सेठ,सचिव सुहास चौधरी, कोषाध्यक्ष डॉ आशिष महाजन, डॉ राजेश सोनवणे, डॉ पराग पाटील, नितीन पाटील, सुधीर साठे, कडू माळी, अमरीश चौधरी, बंडू जोशी, सनी डांगी यांनी परिश्रम घेतले.
