मुंबई : एसटी कर्मचाऱ्यांचे नेतृत्व करणारे अॅड. गुणरत्न सदावर्ते यांना मुंबई पोलिसांनी ताब्यात घेतलं आहे. सरकारी कामात अडथळा आणल्याप्रकरणी गावदेवी पोलीस स्टेशनमध्ये अॅड. सदावर्ते यांच्यावर गुन्हा दाखल करण्यात आला आहे. दरम्यान, राष्ट्रवादी काँग्रेसचे अध्यक्ष शरद पवार यांच्या घरावर हल्ला प्रकरणी मुंबई पोलिसांनी १०७ लोकांना अटक केली आहे.
शरद पवार यांच्या सिल्व्हर ओक घरावर झालेल्या हल्ल्यात एक पोलीस अधिकारी जखमी झाला आहे. त्यामुळे अॅड. सदावर्ते यांच्यावर आयपीसी कलम 353 (सरकारी कामात अडथळा, 120 B समान हेतू) या अंतर्गत गुन्हा दाखल करण्यात आला आहे.
माझ्या जिवाला धोका : सदावर्ते
दरम्यान कोणतीही नोटीस न देता मला ताब्यात घेतलं असून ही व्यक्तीस्वातंत्र्यावर गदा आहे. मला ताब्यात घेताना कोणत्याही प्रक्रियेचे पालन करण्यात आलं नाही. माझ्या जीवाला काही धोका निर्माण झाला तर त्याला गृहमंत्री दिलीप वळसे पाटील जबाबदार असतील असंही सदावर्ते म्हणाले.
